Nuevu
L’ángulu ciegu. Muestra de poesía asturiana actual (2001-2025)
Varios
979-13-88149-37-5
- Edición: Primera
- Páxines: 192
- Fecha de publicación: 02/07/2026
- Formatu: 14 x 21 cm
- Idioma: Asturianu
18,00 €
Esta muestra de poesía asturiana actual /2001-2025) ta a cargu de Ricardo Candás (Xixón, 1977), Héctor Fernández (Lluanco, 1968), José Ángel Gayol (Mieres del Camín, 1977) y Héctor Pérez Iglesias (Arlós, Llanera, 1978).
L’encuadre, l’envís, el propósitu d’esta muestra poética queden definíos dende’l mesmu títulu del volume, L’ángulu ciegu. Un títulu qu’establez una analoxía ente la invisibilidá nel retrovisor del espaciu qu’un vehículu en movimientu va dexando atrás al desplazase, y la situación d’invisibilidá crítica que per venticinco años careció una amplia y significativa zona de la poesía asturiana. Nel estudiu que da entamu a la obra empieza por constatase’l fechu de qu’ente los caberos años de la pasada centuria y los primeros del sieglu actual foi produciéndose una consistente y continuada evolución estética nuna parte fundamental de la creación llírica. Señálase amás la esistencia d’un vaciu teóricu respeuto a les obres poétiques xeneraes nel primer cuartu del sieglu XXI: enllenar tal insuficiencia ye’l propósitu básicu d’esta obra. L’ángulu ciegu qu’esta antoloxía quier amosar vien definíu por una poesía más urbana que rural, menos señaldosa que reflexiva, más arriesgada que tradicionalista, tan global como local. Ye en particular relevante la convivencia con moos d’espresión non estrictamente lliterarios: pensamientu filosóficu o científicu y artes plástiques tán presentes nes nueves creaciones, rescampla tamién la presencia de formes artístiques procedentes de la cultura pop como la música, el cine o’l cómic. Nos actuales escritores asturianos, arriendes de sentise l’ecu de la voz d’otros poetes, vese’l mundu pelos güeyos de John Brack, de Degas y de Mark Rothko, mientres suenen de fondu Miles Davis, Nacho Vegas, The Beatles y Joy Division al empar que s’invoquen presencies como la de Leia Organa o la de Batman: tolo que nesti cuartu de sieglu quedó n’ángulu ciegu espéyase nesti llibru. Esta muestra de poesía asturiana actual ta a cargu de Ricardo Candás (Xixón, 1977), Héctor Fernández (Lluanco, 1968), José Ángel Gayol (Mieres del Camín, 1977) y Héctor Pérez Iglesias (Arlós, Llanera, 1978).
Productos asemeyaos
