En llucha incierta
John Steinbeck
978-84-19358-66-0
- Edición: Primera
- Páginas: 440
- Fecha de publicación: 15/09/2023
- Tamaño: 13 x 20 cm
- Idioma: Asturianu
25,00 € impuestos inc.
impuestos inc.
En llucha incierta ye una de les noveles más polítiques, desconocíes y interesantes de John Steinbeck, que por si nun fuera abondo va recordate un principiu básicu: NUN SEYAS ESQUIROL, REDIÓS.
«En California los años trenta del sieglu XX tuvieron marcaos por una retafila de güelgues campesines qu’afectaron al 65 % de les colleches y nes que participaron cerca de cincuenta mil güelguistes. Nel 1933 hubo trenta y siete güelgues: en ventinueve d’elles los trabayadores llograron beneficios y venticuatro llideróles la CAWIU, el sindicatu comunista. Una d’elles inspiró En llucha incierta, publicada nel 1936, el mesmu añu en que la xusticia disuelve la CAWIU por antiamericana. Ello ye que los protagonistes d’esta obra son rojos; sí, comunistes, radicales, rojos... de los que non solo lluchen por algamar la xuba de xornales sinón que busquen que los pañadores de mazana trabayen con solidaridá, en defensa propia, en comuña porque ye na esperiencia del conflictu onde los xornaleros van deprender la importancia de too ello. Los protagonistes dexen el romanticismu pa prau bien lluego porque nes cuatrocientes páxines siguientes van tener qu’enfrentase a amenaces, traiciones, insultos, detenciones, tundes, quemes y asesinatos. Retratu del poder de la clase trabayadora y crónica d’una llucha dacuando amarga y desesperada que se describe con intensidá y emoción, En llucha incierta ye una de les noveles más polítiques, desconocíes y interesantes de John Steinbeck, que por si nun fuera abondo va recordate un principiu básicu: NUN SEYAS ESQUIROL, REDIÓS», Rafael Rodríguez Valdés.
John Steinbeck (Salinas, California, 1902- Nueva York, 1968) ta consideráu ún de los escritores más señalaos de los Estaos Uníos. Novelista, cuentista, periodista, corresponsal de guerra y guionista, l’autor norteamericanu, ganador del premiu Pulitzer (1940) y del Nobel (1962), escribió cerca de trenta llibros, onde destaquen Tortilla Flat, De mures y homes, En llucha incierta, Les uves de la ira, La lluna púnxose, La perla, Al este del Edén o Xueves duce. Nelles tienen presencia, ente otros temes, la fuerza de la dignidá humana y la radiografía ensin concesiones de la sociedá. En llucha incierta inxértase nel ciclu narrativu de Steinbeck que, marcáu poles condiciones de vida y poles lluches de la xente que tenía por únicu capital les manes, inclúi obres como Tortilla Flat, De mures y homes y Les uves de la ira. Igual qu’estes, En llucha incierta cuenta con una adaptación cinematográfica estrenada nel 2016.
Daniel García Granda (La Pola Siero, 1972) ye escritor y profesor de Llingua Inglesa. Como traductor ye responsable, en xunto cola escritora Laura Marcos, del proyectu Asturpoetry, antoloxía de poesía asturiana traducida al inglés, mesmo que de poner n’asturianu versos de Kenneth Rexroth y l’antoloxía El saber del país de John Berger (Trabe, 2022).
Productos relacionados
