Hai una llinia trazada. Historia de la música asturiana
Xune Elipe
978-84-18286-77-3
- Edición: Primera
- Páxines: 240
- Fecha de publicación: 01/01/2022
- Formatu: 17 x 24 cm
- Idioma: Asturianu
20,00 € Impuestos incluíos
Impuestos incluíos
Hai una llinia trazada percuerre’l fechu musical asturianu dende los sos anicios hasta la dómina actual. Al traviés de 25 capítulos l’autor fai un repasu pelos periodos, movimientos y intérpretes más importantes, resaltando los datos y fechos que foron cruciales nel devenir de la nuestra música.
Hai una llinia trazada percuerre’l fechu musical asturianu dende los sos anicios hasta la dómina actual. La nuestra identidá musical foi creándose adulces a lo llargo del tiempu, escomenzando a manifestase y adoptando la so forma ente los sieglos XII y XVI. Otra manera, tamién a partir del sieglu XV ye cuando s’afita la conciencia de que los asturianos y asturianes falaben una llingua diferente de los demás pueblos, siendo vistos como una comunidá humana diferenciada cultural y políticamente. Sobre esti raigañu foron incorporándose adulces en momentos posteriores otros elementos (melodíes, ritmos y instrumentos), hasta algamar la espresión definitiva que tien anguaño la música popular/tradicional asturiana.
Al traviés de 25 capítulos l’autor fai un repasu pelos periodos, movimientos y intérpretes más importantes, resaltando los datos y fechos que foron cruciales nel devenir de la nuestra música. Y ello dende un puntu de vista non colonial, considerando a la música asturiana como un ente vivu y autónomu, non supeditáu nin dependiente d’otros procesos. Una historia contada dende dientro de la propia música del país, con un enclín claramente pedagóxico-divulgativu y militante nacional, social y culturalmente.
La orixinalidá d’esta obra ye tratar tamién el contestu nel que se desenvolvió la música del país, rellacionándola con otros aspectos como la política, l’arte, la lliteratura o la sociedá. Nella ufiértase una panorámica global y amplia del fechu musical asturianu, convirtiéndose nuna ferramienta afechisca pa comprender y analizar qué representó y representa la nuestra música y sobre qué base se sofita’l so futuru.
Xune Elipe Raposo (Avilés, 1962) forma parte del movimientu de reivindicación llingüística desde mui mozu. Venceyáu a los medios de comunicación (radio, prensa y televisión) siempre col asturianu como vehículu d’espresión, tien publicaos tres llibros: Llingua y rock (1992), Rockmería. Un repasu a la música popular del sieglu XX (2009) y Dende la Casa Conceyu (2019).
Ye miembru fundador de la banda de rock Dixebra, cola que tien grabaos una quincena de discos, asina como del proyectu d’estudiu Soncai System, con dos trabayos discográficos na cai. Foi’l creador del sellu discográficu L’Aguañaz que, con más de setenta referencies editaes d’estilos estremaos, ye ún de los catálogos más importantes de la música del país. Ye, amás, director del Anuariu de la Música Asturiana, que lleva publicándose ininterrumpidamente dende l’añu 2000 y ye ún de los pegollos fundamentales de la escena llariega.
Nel ámbitu audiovisual, dirixó la serie documental D’ayeri a güei (TPA) sobre la historia de la música asturiana de magar hai rexistros sonoros, asina como’l programa radiofónicu Al son (RPA), convertíu nuna verdadera enciclopedia sonora del fechu musical asturianu. Anguaño, ye’l responsable de Goxe Producciones, empresa centrada nel ámbitu de la creación cultural n’Asturies y coordina l’Archivu de la Música Contemporánea Asturiana (AMCA).
Productos asemeyaos
