Nuevu
Da-yos caña. El tiempu y el contestu d'una banda de Rock Astur
Xune Elipe
979-13-88149-31-3
- Edición: Primera
- Páxines: 140
- Fecha de publicación: 02/06/2026
- Formatu: 14 x 21,5 cm
- Idioma: Asturianu
18,00 €
El presente ensayu, II Premiu «Yolanda Huergo», axunta campos lliterarios y temáticos estremaos: historia, política, música o biografía danse la mano nun testu que se centra nes circunstancies y socedíos más importantes a nivel asturianu y internacional, que posibilitaron el surdimientu d’un grupu como Dixebra nuna ciudá como Avilés.
El presente ensayu axunta campos lliterarios y temáticos estremaos: historia, política, música o biografía danse la mano nun testu que se centra nes circunstancies y socedíos más importantes a nivel asturianu y internacional, que posibilitaron el surdimientu d’un grupu como Dixebra nuna ciudá como Avilés. Nesti sen, tener conocencia de la crisis del petroleu nos años setenta, de la llegada de la democracia formal, del nacimientu del asturianismu contemporaneu, de la reestructuración del sector industrial, de la llegada del punk, de los medios alternativos de comunicación, del descubrimientu del nacionalitarismu llibertariu, del impactu de les drogues, del ambiente urbanu, de los conflictos llaborales, de la instauración del réxime autonómicu… va danos les claves de los porqués surde una formación musical como Dixebra y qué repercusión va tener too ello na so ideoloxía y mensaxe. Nestes páxines tóquense cuestiones de calter históricu, social, cultural o llingüísticu, entellazaes con anécdotes o referencies biográfiques. Sicasí, nun ye un exerciciu de señardá vacíu, saber d'au venimos va facilitanos conocenos meyor a unes xeneraciones de les clases populares y trabayadores asturianes marcaes y moldiaes por unos fechos concretos de la historia recién.
Xune Elipe Raposo (Villalegre, Avilés, 1962) ye activista del movimientu de reivindicación llingüística y nacional dende mui mozu. Tien desarrollao un llabor granible nos medios de comunicación (radio, prensa y televisión), siempre col asturianu como vehículu d’espresión. Ye miembru fundador de la banda de rock Dixebra, asina como del proyectu d’estudiu Soncai System. Creador del sellu discográficu L’Aguañaz que, con más de setenta referencies editaes d’estilos estremaos, ye ún de los catálogos más importantes de la música del país. Ye’l responsable de Goxe Producciones, empresa centrada nel ámbitu de la creación cultural asturiana, director del Anuariu de la Música Asturiana, que lleva publicándose ininterrumpidamente dende l’añu 2000 y coordina l’Archivu de la Música Contemporánea Asturiana (AMCA). Dirixó la serie documental D’ayeri a güei (TPA) sobre la historia de la música asturiana de magar hai rexistros sonoros, asina como’l programa radiofónicu Al Son (RPA), convertíu nuna verdadera enciclopedia sonora del fechu musical asturianu. Tien publicaos los llibros Llingua y rock (1996), Rockmería. Un repasu a la música popular del sieglu xx (2009), Dende la Casa Conceyu (2019) y Hai una llinia trazada. Historia de la música asturiana (XXVI Premiu d’Ensayu «Máximo Fuertes Acevedo», 2022).
Productos asemeyaos
